Sosial
26.08.2015 / 11:34

Səlim Müslümov G20 toplantısına qatılacaq

Səlim Müslümov G20 toplantısına qatılacaqTürkiyə Respublikasının dünyanın iqtisadi cəhətdən ən çox inkişaf etmiş 20 ölkəsini birləşdirən G20 qrupuna sədrliyi çərçivəsində sentyabrın 3-4-də Ankara şəhərində həmin qrupun üzvü olan və dəvət edilən ölkələrin əmək və məşğulluq nazirlərinin toplantısı keçiriləcək. Tədbirdə Azərbaycan Respublikasının əmək və əhalinin sosial müdafiəsi naziri Səlim Müslümovun başçılıq etdiyi nümayəndə heyəti iştirak edəcək. Əmək və Əhalinin Sosial Müdafiəsi Nazirliyinin mətbuat xidmətindən verilən xəbərə görə, toplantı zamanı Türkiyənin G20 qrupuna sədrliyi üçün müəyyən etdiyi prioritetlərə uyğun olaraq əmək bazarının inkişaf etdirilməsi və daha inkluziv əmək bazarının təşviq olunması, insan resurslarına sərmayənin artırılması, əmək bazarına dair səmərəli monitorinqin aparılması, iş qüvvəsinə olan tələb və təklif arasında uyğunsuzluğun aradan qaldırılması və s. məsələlər müzakirə olunacaq.

Tədbir çərçivəsində maliyyə nazirləri ilə birgə keçirilməsi nəzərdə tutulan sessiyada əmək gəlirlərinin əhalinin ümumi gəlirlərindəki payı, iqtisadi inkişafın məşğulluğun artmasına təsirinin gücləndirilməsi məsələləri ətrafında fikir mübadiləsinin aparılması da planlaşdırılır.

Türkiyənin G20 qrupuna sədrliyi dövründəki toplantılarda Azərbaycan tam hüquqlu üzv kimi iştirak etməyə dəvət olunub. Dünya iqtisadiyyatının 90%-ni və dünya əhalisinin üçdə ikisini təmsil edən G20 qrupunun gündəliyində qlobal inkişaf, enerji səmərəliliyi, iqlim dəyişikliyi, yoxsulluğun aradan qaldırılması, ticarət, məşğulluq, qida təhlükəsizliyi və digər məsələlər əksini tapır.

İnform.az

Baxış sayı: 296