Mədəniyyət
07.12.2018 / 18:00

"Azərxalça"nın Quba filialının yaradılmasının birinci ildönümü qeyd olunub/ FOTO

      "Azərxalça"nın Quba filialının yaradılmasının birinci ildönümü qeyd olunub/
"Bir ildir fəaliyyətə başlayan “Azərxalça” ASC-nin Quba filialında 365 kvadratmetr olmaqla, 130 ədəd xalça toxunub. Müəssisədə yüzə yaxın xalçaçı işlə təmin olunub".

İnform.az-ın "Azərxalça"-nın Mətbuat xidmətinin məlumatına istinadən verdiyi xəbərə görə, bu barədə dekabrın 7-də xalça fabrikinin istifadəyə verilməsinin bir illiyi münasibətilə kollektivlə keçirilən görüşdə bildirilib.

“Azərxalça” ASC-nin mətbuat katibi Tural Səfərov Qubada xalçaçılıq müəssisəsinin 2017-ci il dekabrın 7-də Prezident İlham Əliyevin və birinci xanım Mehriban Əliyevanın iştirakı ilə istifadəyə verildiyini diqqətə çatdıraraq, əlamətdar gün münasibətilə Səhmdar Cəmiyyətin rəhbərliyi adından kollektivi təbrik edib.

Diqqətə çatdırılıb ki, bölgələrdə xalça emalı müəssisələrinin yaradılması dövlətimizin başçısının xalçaçılığın inkişafına göstərdiyi diqqət və qayğısının əyani təzahürüdür. Prezident İlham Əliyev filialın açılış mərasimində bu bölgənin milli xalçaçılığa verdiyi töhfələri yüksək qiymətləndirərək deyib: “Quba həmişə xalçaçılıq mərkəzlərindən biri olub. Qubanın xalçaları həm ölkəmizin, həm də xarici ölkələrin muzeylərində nümayiş etdirilir. Yəni, Qubada həmişə çox güclü xalçaçılıq ənənələri olmuşdur”.

Tural Səfərov bildirib ki, ölkə rəhbərinin tapşırıq və tövsiyələrinə uyğun olaraq, bölgələrdəki filiallar öz fəaliyyətlərini gündən-günə genişləndirir. Bu müəssisələrdə peşəkar toxucular tərəfindən keyfiyyətli xalçalar toxunur.

“Azərxalça” ASC-nin Quba filialının direktoru Nəzakət Novruzova qeyd edib ki, xalçaçılar Quba şəhərinin və rayonun ayrı-ayrı kəndlərinin sakinləridir. Onlar bir neçə ay ərzində “Azərxalça”nın hazırlıq-tədris kurslarında iştirak edib, xalçaçılıq üzrə bacarıq və vərdişlərini təkmilləşdiriblər.

Hazır olan xalçalar Quba, Şirvan və Qarabağ çeşniləri əsasında toxunub. Üzərlərində çeşnilərin adı və “Azərbaycan” yazısı qeyd olunub. Bu da qədim sənətkarlıq nümunələrinin müəllif hüququnun qorunmasına, eyni zamanda, Azərbaycan incəsənətinin dünyaya tanıdılmasına xidmət edir.

Tədbirdə toxuculardan Yeganə Niftəliyeva, Həmidə Valehova çıxış edərək qubalı xalçaçıların bu bölgənin qədim xalçaçılıq ənənələrini yaşadacaqlarına, daha gözəl xalçalar toxuyacaqlarına əminliklərini ifadə ediblər. Xalçaçılar onlara göstərilən diqqət və qayğıya görə dövlətimizə minnətdarlıqlarını bildiriblər.

Sonda yüksək peşəkarlığı ilə fərqlənən bir qrup toxucuya “Azərxalça” ASC-nin fəxri fərmanı təqdim olunub.

      "Azərxalça"nın Quba filialının yaradılmasının birinci ildönümü qeyd olunub/


      "Azərxalça"nın Quba filialının yaradılmasının birinci ildönümü qeyd olunub/


      "Azərxalça"nın Quba filialının yaradılmasının birinci ildönümü qeyd olunub/


      "Azərxalça"nın Quba filialının yaradılmasının birinci ildönümü qeyd olunub/




İnform.az


.

Baxış sayı: 327