Dini maarifləndirmə layihəsi çərçivəsində tədbir keçirilib- Lənkəranda (Foto)

Dünən Dini Qurumlarla İş üzrə Dövlət Komitəsinin (DQİDK) Lənkəran bölgəsi üzrə şöbəsi və Azərbaycan Respublikası Prezidenti yanında Bilik Fondunun birgə təşkilatçılığı ilə Lənkəran şəhərində Fondun dini maarifləndirmə layihəsi çərçivəsində tədbir keçirilib.

Şöbədən İnform.az-a verilən məlumata görə,tədbirdə DQİDK-nin Lənkəran bölgəsi üzrə şöbəsinin müdiri Qağayı Məmmədov, Bilik Fondunun Ölkədaxili layihələr sektorunun müdiri Hacı Abdulla, rayonun din xadimləri, ictimaiyyətin nümayəndələri iştirak edib.

Tədbiri giriş sözü ilə açan DQİDK-nin Lənkəran bölgəsi üzrə şöbəsinin müdiri Qağayı Məmmədov məruzəsində bölgədə keçirilən maarifləndirmə tədbirlərinin əhəmiyyətinə toxunub. Dini radikalizm və onun fəsadlarından danışan Q.Məmmədov, milli-mənəvi, tolerant və multikultural dəyərlərin təbliğ edilməsini dini radikalizmə qarşı mübarizədə zəruriliyini vurğulayıb.

Bilik Fondunun Ölkədaxili layihələr sektorunun müdiri Hacı Abdullaməruzəsində milli-mənəvi və dini dəyərlərimizin qorunub saxlanılması və inkişafında Ümummilli Lider Heydər Əliyevin müstəsna xidmətlərini qeyd edib.

Lənkəran rayonu Hirkan qəsəbə məscidi dini icmasının sədri və imamı Ayaz Mirzəyev, rayonun Liman şəhər “Cümə” məscidi dini icmasının sədri Vidadi Qurbanzadə və digərləri çıxışlarında həyata keçirilən maarifləndirmə tədbirlərinə görə minnətdarlıqlarını ifadə ediblər.

Sonda tədbir iştirakçılarını maraqlandıran suallar cavablandırılıb.

İnform.az