Mədəniyyət
24.05.2018 / 17:30

"“Qafqaz üçlüyü” yoxsa qara ləkə?- Nazirlikdən münasibət

"“Qafqaz üçlüyü” yoxsa  qara ləkə?-
"“Qafqaz üçlüyü” filmi Rüstəm İbrahimbəyovun yaradıcılıq bioqrafiyasında qara ləkə olaraq qalacaq"

İnform.az-ın xəbərinə görə, bu sözlər Mədəniyyət və Turizm Nazirliyinin Kinodramaturq Rüstəm İbrahimbəyovun ssenarisi əsasında lentə alınmış “Qafqaz üçlüyü” filminə bildirilən münasibətdə yer alıb:

Son illər ermənipərəst dairələrin Azərbaycan dövlətinə və xalqına qarşı apardığı məqsədli iftira, qarayaxma kampaniyasının tərkib hissəsidir və ikrah doğuran bir fakt kimi bütün cəmiyyətimiz tərəfindən qəti şəkildə pislənilir.

Ermənistanın Azərbaycana qarşı ərazi iddiaları və işğalçılıq siyasəti başlayan ilk gündən düşmən ölkənin, dünyadakı erməni lobbisinin bütün resursları Azərbaycan xalqını qəddar, davakar, ermənilərə qənim kəsilmiş bir xalq olaraq tanıtmağa və bununla Dağlıq Qarabağdakı separatçılığa əsas qazandırmağa yönəldilib.

Təəssüf ki, bu işdə bəzi “sapı özümüzdən olan”lar da düşmənin məkrinə alət olaraq doğulduğu torpağa, mənsub olduğu xalqa qarşı çirkin fəaliyyət göstərirlər.

Rüstəm İbrahimbəyovun bu istiqamətdə fəaliyyəti artıq neçə illərdir ki davam edir və o, çoxdan tükənmiş “yaradıcılıq gücü”nü erməni ünsürlərlə əlbir olaraq Azərbaycan xalqını aşağılamaq, onu mədəniyyətsiz, milli kökləri olmayan xalq kimi göstərmək yolunda sərf edir.

“Qafqaz üçlüyü” filmi bu idbar, eybəcər yaradıcılığın daha bir nümunəsidir. İdiyədək müxtəlif müsahibələrində ermənilərin ünvanına səsləndirdiyi rəğbət dolu fikirlər, Azərbaycan torpaqlarının işğalında ermənilərin deyil, hansısa mücərrəd qüvvələrin günahkar olduğunu dilə gətirməsi onun bu mövqeyini cəmiyyətə yetərincə nümayiş etdirib.

“Qafqaz üçlüyü” filmində Azərbaycan xalqını riyakar, mədəniyyətsiz kimi təqdim etmək zaman-zaman erməni diaspor təşkilatlarının, erməni millətçilərinin apardıqları anti-Azərbaycan təbliğatının davamıdır. Bu filmin ortaya çıxması Rüstəm İbrahimbəyovun əsl simasını bir daha ortaya qoyur.

Artıq neçə illərdir bədii dəyərə malik bir ekran əsəri, kino layihəsi ilə ortaya çıxarmağa müvəffəq olmayan Rüstəm İbrahimbəyov yalnız belə siyasi sifarişli, məqsədli “film”-parodiyalarla gündəmdə qalmağa çalışır. Başdan-ayağa yalan, iftira, eyni zamanda, siyasi konyunktura əsasında qurulan “Qafqaz üçlüyü” filminin onun yaradıcılıq bioqrafiyasında qara ləkə olaraq qalacağı şübhə doğmur və Rüstəm İbrahimbəyov bununla Azərbaycan xalqının əbədi nifrətini qazanmışdır.

Mədəniyyət Nazirliyi Rüstəm İbrahimbəyovun ssenarisi əsasında Azərbaycan xalqını aşağılayan, onun milli hisslərini təhqir edən, cılız siyasi məqsədlər güdən belə bir eybəcər “film”in çəkilməsini qəti şəkildə pisləyir, yaradıcılığının son illərini vətənə, içərisindən çıxdığı xalqa dönük insan olaraq yaşayan kinodramaturqun bu ikrah doğuran əməllərindən dərin təəssüf hissi keçirdiyini bəyan edir. Rüstəm İbrahimbəyov unutmamalıdır ki, öz xalqını aşağılamaqla hələ heç kəsə ucalmaq, adını tarixə yazmaq müyəssər olmayıb.

İnform.az

Baxış sayı: 61