Elm-təhsil
15.01.2018 / 19:20

"Qida təhlükəsizliyinin təmin olunması vacib məsələlərdəndir"- Akademik Rasim Əliquliyev

"Qida təhlükəsizliyinin təmin olunması vacib məsələlərdəndir"-Yanvarın 15-də AMEA Kimya Elmləri Bölməsinin növbəti iclası keçirilib. İclasda çıxış edən AMEA-nın akademik-katibi, akademik Rasim Əliquliyev son zamanlar ölkədə təhlükəsizlik sahəsində həyata keçirilən tədbirlərdən söz açıb.

AMEA Rəyasət Heyətinin aparatı İctimaiyyətlə əlaqələr şöbəsidən İnform.az-a daxil olan məlumatda bildirilir ki, alim ictimai həyatın bütün sferalarında təhlükəsizliyin təmin olunması ölkə Prezidenti İlham Əliyevin daim diqqət mərkəzində saxladığı məsələlərdən olduğunu vurğulayıb.

R.Əliquliyev Azərbaycanda son illərdə qida təhlükəsizliyinin təmin edilməsi, qida məhsullarının keyfiyyətinin yüksəldilməsi və ixrac potensialının artırılması sahəsində mühüm nailiyyətlərin əldə edildiyini qeyd edib. Dövlət başçısının ölkədə qida təhlükəsizliyi sisteminin təkmilləşdirilməsi ilə bağlı həyata keçirdiyi tədbirlərin, eyni zamanda Azərbaycanın Qida Təhlükəsizliyi Agentliyinin yaradılması ilə bağlı imzaladığı Fərmanın bu istiqamətdə əhəmiyyətli addımlardan olduğunu vurğulayıb.

AMEA-nın akademik-katibi qeyd edilən sahədə dünya təcrübəsindən də söz açaraq Rusiya Elmlər Akademiyasında qida kimyası ilə bağlı laboratoriyaların fəaliyyət göstərdiyini, elmi-nəzəri tədqiqatların aparıldığını diqqətə çatdırıb.

Qida təhlükəsizliyinin yüksək səviyyədə təmin olunmasının zəruriliyini vurğulayan akademik R.Əliquliyev bu sahədə kimya elmləri istiqamətində fəaliyyət göstərən alim və mütəxəssislər qarşısında xüsusi vəzifələrin dayandığını qeyd edib. Alim ölkədə qida kimyası sahəsində fundamental tədqiqatların aparılmasının vacibliyini önə çəkib.

İnform.az


Baxış sayı: 160