Sosial
25.11.2015 / 10:30

Zərərli orqanizmlərə qarşı mübarizə tədbiri gücləndirilib

Zərərli orqanizmlərə qarşı mübarizə tədbiri gücləndirilibXüsusi təhlükəli zərərli orqanizmlərə qarşı kompleks mübarizə tədbirlərini gücləndirmək məqsədi ilə Dövlət Fitosanitar Nəzarəti Xidməti gücləndirilmiş iş rejiminə keçib.

İnform.az "Trend"ə istinadən xəbər verir ki, Kənd Təsərrüfatı Nazirliyinin tapşırığına əsasən, Dövlət Fitosanitar Nəzarəti Xidmətinin əmri ilə ölkə ərazisində 2015-2016-cı illərdə xüsusi təhlükəli zərərli orqanizmlərə (siçanabənzər gəmiricilər və taxıl böcəyi ) qarşı kompleks mübarizə tədbirlərini gücləndirmək və bu tədbirlərin səmərəli həyata keçirilməsində yerli qurumlara, fermerlərə əməli köməklik göstərmək məqsədi ilə Quba-Xaçmaz, Gəncə-Qazax, Lənkəran-Astara, Şəki-Zaqatala, Yevlax-Beyləqan, Şirvan-Kürdəmir bölgələri üzrə qərargahlar yaradılıb.

Dövlət Fitosanitar Nəzarəti Xidmətindən verilən məlumata görə, siçanabənzər gəmiricilər kütləvi artıb, çoxaldığı illərdə kənd təsərrüfatı bitkiləri üçün böyük təhlükə törədir. Nəzəri olaraq 35 siçan cütlüyü çoxalaraq bir ilin sonunda öz sayını 100000 çatdıra bilir. Odur ki, onların monitorinqinin aparılması, yayılma arealının və say miqdarının müəyyən edilməsi, aparılacaq mübarizə tədbirlərinin həcminin proqnozlaşdırılması, kimyəvi və aqrotexniki mübarizə tədbirlərinin vaxtında və keyfiyyətli aparılması vacib şərtlərdəndir.

Dərin şumun aparılması, sahələrin suvarılması, dondurma suyunun verilməsi gəmiricilərin məhv olmasına səbəb olur. Cari ildə siçanabənzər gəmiricilərin say miqdarı iqtisadi ziyanvermə həddindən yüksək olan ərazilərdə mübarizə tədbirləri başa çatmaq üzrədir. Lakin, havaların mülayim keçməsi nəticəsində gəmiricilərin sayı iqtisadi ziyanvermə həddindən az olan sahələrdə də artaraq bu həddi keçə bilər. Bu səbəbdən də Dövlət Xidməti gəmiricilərin artım dinamikasına nəzarət edilməsi məqsədilə zəruri tədbirləri həyata keçirir.

Baxış sayı: 335