Mədəniyyət
27.10.2015 / 06:14

Braziliyada "Qanlı yanvar" filmi nümayiş etdirilib

Braziliyada "Qanlı yanvar" filmi nümayiş etdirilib Oktyabrın 23-də San Paulo şəhərinə işçi səfəri zamanı Azərbaycanın Braziliyadakı səfiri Elnur Sultanov 39-cu “Mostra”- San Paulo Beynəlxalq kinofestivalı çərçivəsində rejissor Vahid Mustafayevin “Qanlı Yanvar” filminin təqdimatında iştirak edib.
Azərbaycanın Braziliyadakı səfirliyindən verilən məlumata görə, filmin nümayişindən öncə yerli tamaşaçılar qarşısında çıxış edən səfir E.Sultanov filmin Braziliyada və ümumiyyətlə, Latın Amerikasında ilk dəfə təqdim olunduğunu qeyd edib və 20 Yanvar faciəsi haqqında ətraflı məlumat verib. O, Azərbaycanın müstəqilliyi uğrunda apardığı mübarizədən danışaraq 20 Yanvar faciəsi qurbanlarının Azərbaycan xalqı tərəfindən hər il yad edildiyini qeyd edib.

Səfir E.Sultanov vurğulayıb ki, faciədən dərhal sonra 1990-cı il 21 yanvar tarixində Azərbaycan xalqının Ümummilli Lideri Heydər Əliyev ölkəmizin Moskvadakı daimi nümayəndəliyinə gələrək bu hərbi müdaxiləyə kəskin etirazını bildirib, faciə törədənləri ittiham edib və qoşunların dərhal Bakıdan çıxarılmasını tələb edib. 20 Yanvar hadisələrinin Azərbaycan xalqının tarixində qəhrəmanlıq səhifəsi olduğunu qeyd edən səfir bu filmin Azərbaycan xalqının müstəqilliyi uğrunda apardığı mübarizəsini braziliyalı tamaşaçıların diqqətinə çatdırmağa xidmət edəcəyini bildirib. Festival çərçivəsində film diplomla təltif edilib və festivalın təşkilatçıları diplomu ANS şirkətinin nümayəndəsi Kamran Qasımova təqdim edib.

Qeyd edək ki, “Qanlı Yanvar “ filmi tamaşaçılar tərəfindən böyük maraqla qarşılanıb.

İnform.az

Baxış sayı: 400