Baş xəbər, Mədəniyyət, Müsahibə
28.09.2015 / 11:03

Akif Əli: “Mən sizə göstərərəm bacarığımı”

Akif  Əli: “Mən sizə göstərərəm bacarığımı”
Tapdığı tapmışıq


O yeni eranın ikinci min illiyinin ikinci yarısının ikinci ilində, ikinci aynın iyirmi ikisində gecə saat ikidən iki saat iyirmi iki dəqiqə keçmiş qədim qalada dünyaya gəlib. İlk baxışdan mürəkkəb görünən bu cümlənin müəllifi bu günkü müsahibimizin özü.

Kino tariximizin Tapdığı


Azərbaycan kinosunun Tapdığını təbii ki, xatırlayırsınız. “Tütək səsi” filmindən az qala bütün xalqa sevilən Tapdıq obrazı qəhrəmanımızın vizit kartlarından biridir desək, yanılmarıq. Yəqin elə ona görədir ki, azərbaycanlı tamaşaçının gözü Tapdığı indi də kinoda axtarır. Dəfələrlə şahidi olmuşam ki, yaşlı nəsil adamlarından kim isə “balam, bu Tapdığı oynayan oğlan da yoxa çıxdı da... hara getdi bilinmədi” deyib.
Bax elə buna görə də babalarımızdan balalarımıza kimi hər kəsi bizim bu müsahibəni oxumağa çağırırıq və deyirik ki, Tapdığı tapmışıq - Akif Əli.

-Akif müəllim, Azərbaycan kinosunda ilk atdığınız addım Tapdıq obrazı ilə oldu və elə ilk addımınızdan da sevildiniz, amma biz də olan məlumata görə siz ilk dəfə başqa ölkədə, başqa filimdə baş rola çəkilmisiniz, elədirmi?

-Bəli, kinoda ilk dəfə “Tacikfilm” və “Lenfilm” –in istehsalı olan “Uzun müharibədə qısa görüşlər” bədii filmində Rüstəm obrazını yaratmışam. O zamanlar Sovetlər Birliyi var idi və film çəkəndə də yaradıcı heyətin seçimi bir məkan daxilində aparılırdı. Leninqradlı kinorejissor Stanislav Çaplin Düşənbədə bu filmi çəkməyə başlayanda öz assistentini Orta Asiya və Zaqafqaziya respublikalarına göndərmişdi ki, Rüstəm obrazı üçün aktyor seçsin. Mən də o zamanlar kino ilə maraqlanırdım və kinostudiyada SSRİ Xalq Artisti, professor Adil İsgəndərovun rəhbərlik etdiyi kinoaktyorluq kurslarına gedirdim. “Azərbaycanfilm”də olan Çaplinin assistenti mənim də fotoşəkilimi özü ilə aparıbmış. Günlərin bir günü Düşənbədən teleqram aldım, məni sınaq əkilişlərinə dəvət edirdilər. Ən maraqlısı o oldu ki, sınaq çəkilişlərindən sonra məni evə yola salanda artıq S.Çaplin mənimlə işləmək istədiyini bildirdi. Beləcə ilk baş rolum Rüstəm oldu.

-Akif müəllim, biz bilirik ki, o film də “Tütək səsi” filmi kimi müharibə mövzusunda çəkilmiş filmdir. Bizim üçün maraqlıdır: siz bir filmin çəkilişlərin bitirməmiş ikinci filmin çəkilişinə necə başladız, həm də eyni mövzuda?

-Elədir, mən o zaman Leninqradda idim və çəkilişlərimə davam edirdim, burda isə Rasim Ocaqov “Tütək səsi” filmini çəkməyə hazırlaşırmış. Yenə teleqram aldım ki, məni Azərbaycanfilmdə adıçəkilən filmin sınaq çəkilişlərinə dəvət edirlər. Gələndə mənə dedilər ki, burda yenə də Tapdıq obrazına çoxlu sınaq çəkilişləri olub, amma Rasim Ocaqovu razı salan aktyor tapa bilməyiblər, onda kim isə deyib ki, bir azərbaycanlı oğlan Leninqradda filmə çəkilir, bəlkə bir onu da yoxlayaq. Beləliklə məni çağırıblar və mən vətəndə çəkilmək arzusu ilə tərəddüd etmədən gəldim. Maraqlıdır ki, Stanislav Çaplin kimi, Rasim Ocaqov da elə sınaq çəkilişlərindən dərhal sonra mənimlə işləmək istədiyini açıq dedi.

Sonralar daha iki filmə çəkildi gənc Akif:
1) “Arxadan vurulan zərbə” – Fazil müəllim
2) “Əgər biz bir yerdəyiksə” – Məmməd
Bununla da Akif Məhərrəmov Azərbaycan kinosundan getdi. Görəsən səbəb nə idi? Bunu özü belə ifadə edir: “Günlərin bir günü mən özümə dedim ki, bəsdi, daha kinoya çəkilmək istəmirəm!!!” Axı, niyə?

-Mən ixtisasca filoloqam və mənim üçün özünü ifadə tərzi kimi qələmi daha məqbul sayıram. Buna görə də aktyorluğa son qoyub keçdim mətbuata.

Bəzən biz jurnalistlərə sualı səkkiz qat düşünmək qalır və ən azından sözün düzün dedizdirənə kimi müsahibinə bir sualı iki, üç bəzən də beş dəfə fərqli formada verməli oluruq. Hələ də bir düşünün qarşında oturan müsahib peşəkar jurnalistdirsə vəziyyət necə də çətin olur. Bu məqamda həqiqətən də müsahibim məni pis vəziyyətdə qoymuşdu. Mən sualı bir az daha sərt qoysam inciyəcəkdi. Sadəcə, Akif müəllim, həqiqəti deyin dedim və dönüb mənə dedi: “Siz məni məcbur edirsiz mən sirlərimi açım”. -“Açın”!!! deyə inad etdim və sualı birdə təkralladım kinodan niyə getdiz?

-Dedim ki, mən hələ orta məktəbdə olanda kinoya marağım böyük idi. Hətta məktəbi bitirib İncəsənət İnstitutunun Kinoaktyorluq fakültəsinə imtahan da vermişdim, amma daxil ola bilməmişdim. Bəlkə də onun hikkəsi qalmışdı məndə ki, yaxşı, mən sizə göstərərəm aktyor bacarığımı... və sübut da etdim. Yəni sözümü dedim və üz çevirib getdim.


Mətbuat tariximizin Akif Əlisi


Sonralar Akif Əli deyəcəkdi: “İstedadlı adam hər sahədə istedadlıdı. Əla bir aktyor istəsəydi həm də əla fizik ola bilərdi. Əla rejissor əla rəssam, əla mühəndis, həkim, dövlət xadimi ola bilər. İstedad bir tərəfli deyil, çoxşaxəlidir”. Beləcə Akif Məhərrəmov kinodan mətbuata gəldi, sonralar artıq xeyli tanınmasına baxmayaraq, atasının adını əbədiləşdirmək üçün soyadını rəsmən dəyişib oldu - Akif Əli. Azərbaycan Radiosunda ilk pillədən – kiçik redaktorluqdan fəaliyyətə başlayan bu yeni düşüncə adamı sonralar uzun illər Azərbaycan televiziyasının Gənclər üçün Proqramlar Baş redaksiyasına rəhbərlik etdi. Sonra Bakı Ali Partiya Məktəbi... Elmlər Akademiyasında “M.Ə.Sabirin satira sənətkarlığı” mövzusunda dissertasiya müdafiəsi, filologiya elmi üzrə fəlsəfə doktoru... “Vətən səsi” qəzetinin baş redaktoru... Bakı sosial idarəetmə və Politologiya institutunda “Kulturologiya” kafedrasının müdiri... Kitablar... Məqalələr... Ssenarilər... yaradıcılılqla zəngin bir həyat yolu keçdi müsahibim - respublikanın Əməkdar Jurnalisti Akif Əli.

Vətənə, Xalqa, Dövlətə sədaqətlə xidmət yolu


...Mübarizələrlə dolu 90-cı illərdə Vətənə, xalqa sədaqətlə qulluq edən Akif Əli nəhayət, 1994-cü ilin gərgin oktyabr hadisələrindən sonra ulu öndərin xeyir-duası ilə müstəqil Azərbaycan Respublikası Nazirlər Kabinetinin Mətbuat xidmətinin rəhbəri vəzifəsinə təyin olunur. Bu gün artıq dövlət quluğunun 2-ci dərəcə Dövlət müşaviri olan qəhrəmanımız, həmçinin Prezidentin Sərəncamı ilə “Dövlət qulluğunda fərqlənməyə görə” medalına da layiq görülüb.
Bəli, hər dəfə mən Akif müəllimlə görüşüb söhbət edəndə bir həqiqətin fərqinə varıram ki, bu səmimi və təvazökar insan sözün əsil mənasında böyük bir həyat və yaradıcılıq yolu keçib.

Akif Əli yazır:
“Mən yolam, evə gedən yol,
Sinəmdən nə qədər adamlar keçir,
Üstümdən sevinc də gedir, kədər də,
Xoş niyyət də pis niyyət də.
Mən yolam, peşəm adamları irəli aparmaqdı,
İrəlidə kimi nə gözləyir - bu mənlik deyil.
Mən yolam... hər kəsi evə aparan yol...”


Günay Novruz / İnform.az

Baxış sayı: 1508